Қазақстан халқы Ассамблеясының ҮНДЕУІ

Құрметті отандастар! Қазақстан халқы Ассамблеясы 5 маусым күні Ақ­төбе қаласында болған экстремистік әре­кеттерді қатаң айыптайды. Әлемдегі барша мұсылмандар үшін қасиетті Рамазан айы басталар тұста орын алған жан­түршігерлік оқиға біздің баршамызға, Қазақстан халқына сын-қатер. Мұндай әрекеттер қай жерде, қашан болса да адам­дардың арасында қорқыныш пен сенімсіздік, үрей тудыру, елдің бірлігі мен тұтастығына нұқсан келтіру үшін жасалады. Қазақстан халқы біртұтас ел, өз Отанының патриоттары ретінде осынау тағылық оқиғаны бірауыздан қатаң айыптайды. Жағдайды тұрақсыздандыру, еліміздегі татулық пен келісімді шайқалту мақсатындағы кез келген қадамға біз бірлік, қоғамдық келісім және азаматтық патриотизм қағидаларына адал­дығымызбен қарсы тұрамыз. Қазақстан халқы Ассамблеясы қаза болған­дардың отбасылары мен жақындарына қайғырып көңіл айтады. Қазақстан халқы Ассамблеясы еліміздегі тұрақ­тылықты шайқалту жолындағы кез келген әрекетті үзілді-кесілді айыптайды және барша халқымызды қауіпсіз, өркендеген және тұрақты Қазақстанды нығайтып, дамыту жолындағы Елбасының сындарлы саясатының айналасына ұйыса түсуге үндейді. Біздің әрқайсымыз қазір қырағылық пен сабыр­лылық көрсетуге, асқақ азаматтық парыз сезімін танытуға, тұрақтылығымызды қорғауға тиіспіз. Біздің біртұтас халық, өз еліміздің азаматтары және патриоттары екенімізді барша жұртшылық білетін болсын! Қазақстан халқы Ассамблеясының Кеңесі 2016 жылғы 6 маусым